ရန်ကုန်မြို့တွင်း အငှားယာဉ်များ ငှားရမ်းရ ခက်ခဲသည့် ပြဿနာကို ဖြေရှင်းပေးမည့် Hoho Mobile App အသုံးပြုနိုင်တော့မည်

ရန်ကုန်မြို့တွင်း အများပြည်သူ သယ်ယူပို့ဆောင်ရေးစနစ်တွင် နေ့စဉ်ဖြစ်ပေါ်လျက်ရှိသည့် အငှားယာဉ်များ ငှားရမ်းရခက်ခဲသည့် ပြဿနာကို ဖြေရှင်းနိုင်ရန်အတွက် ပြည်တွင်းအခြေစိုက် Myantel Co.,Ltd က Hoho အမည်ရှိ Mobile App တစ်ခုကို ယခုလ ၆ ရက်တွင် စတင်ဖြန့်ချိတော့မည်ဖြစ်ကြောင်း အဆိုပါကုမ္ပဏီ၏ အမှုဆောင်အရာရှိချုပ် ကိုဓနက ပြောသည်။

အဆိုပါ Hoho App သည် ခရီးသည်များမှ မိမိသွားလိုသည့် ခရီးစဉ်ကို နီးစပ်ရာ အငှားယာဉ်မောင်းများထံ Mobile App မှတစ်ဆင့် ဆက်သွယ်ခြင်းဖြင့် ခေါ်ယူငှားရမ်းနိုင်မည့် ဝန်ဆောင်မှု တစ်ခုဖြစ်သည်။ အဆိုပါ ဝန်ဆောင်မှုကို အငှားယာဉ်မောင်းနှင့် ခရီးသည်ဘက်မှ နှစ်ဦးစလုံး အသုံးပြုမှသာလျှင် အသုံးပြုနိုင်မည်ဖြစ်ပြီး အင်တာနက်စနစ် ချိတ်ဆက်ထားကာ GPS ထည့်သွင်း ထားသည့် စမတ်ဖုန်းအသုံးပြုသူတိုင်း ထည့်သွင်းထားနိုင်မည် ဖြစ်သည်။

ရန်ကုန်မြို့တွင်း၌ အငှားယာဉ်ကိုအသုံးပြုရန် လိုအပ်လာပါက အဆိုပါ Mobile App ကို ထည့်သွင်းထားရုံဖြင့် မိမိနှင့် နီးစပ်သည့် အငှားယာဉ်မောင်းကို ဆက်သွယ်ခေါ်ယူနိုင်မည်ဖြစ်ပြီး ဝန်ဆောင်ခနှုန်းထားများကို ညှိနှိုင်းနိုင်သည့် Call Button ပါရှိကြောင်း သိရသည်။

အဆိုပါ ဝန်ဆောင်မှုသည် ခရီးသည်များအတွက် အခမဲ့စနစ်ဖြစ်ပြီး ဝန်ဆောင်မှုကို အသုံးပြုသော အငှားယာဉ်မောင်းများအတွက် ခရီးစဉ်တစ်ခုပြီးဆုံးတိုင်း မြန်မာငွေ ၁၀၀ ကျပ်ကို ကောက်ခံ မည်ဖြစ်ကြောင်း သိရသည်။

အဆိုပါ App ကို အသုံးပြုသည့် ခရီးသည်များအနေဖြင့် ယာဉ်ပေါ်တွင် မိမိနှင့်အတူပါလာသည့် ပစ္စည်းတစ်စုံတစ်ရာ မေ့ကျန်ခဲ့ခြင်းမျိုး ဖြစ်ပေါ် လာပါကလည်း ပျောက်ဆုံးမှု မဖြစ်စေဘဲ ပြန်လည် ရရှိစေရန် ကုမ္ပဏီဘက်မှ အတတ်နိုင်ဆုံး ကြိုးစားဆောင်ရွက်ပေးမည်ဖြစ်ကြောင်းလည်း သိရသည်။

ယခုလတ်တလောတွင် အဆိုပါ Hoho App ကို Android OS ထုတ်ကုန်များတွင် အသုံးပြုနိုင်ရန်အတွက် Google Play Store တွင် download ရယူသုံးစွဲနိုင်မည်ဖြစ်ပြီး အသေးစိတ်အချက် အလက်များကို http://www.hohotransport.com/ တွင် ဝင်ရောက် လေ့လာနိုင်မည်ဖြစ်ကြောင်း သိရသည်။

Internetjournal