ဘဝမှာ စိတ်ချမ်းသာချင်တယ်ဆိုရင် ဘယ်အလုပ်ကိုမဆို စိတ်ပါလက်ပါ လုပ်ပါ
လူသားတိုင်းဟာ ပိုမိုကောင်းမွန်တဲ့ ဘဝတစ်ခုကို ရှာဖွေဖို့အတွက် အဆုံးမဲ့ ရည်ရွယ်ချက်တွေ တပွေ့တပိုက်နဲ့ ခေါင်းမဖေါ်နိုင်အောင် အလုပ်တွေကို သိမ်းပိုက်ပြီး လုပ်ကြရပါတယ်။ အလုပ်ပြီးရင် အလုပ်သာပဲ လုပ်နေကြရလို့ လူမှုရေးတွေ ခေါင်းပါးပြီး ခေါင်းစားနေရ သူတွေတောင် ရှိပါတယ်။
ယနေ့ခေတ်မှာဆို ပိုက်ဆံအတွက် သာမက လူဘောင်အဖွဲ့အစည်းအတွက် အများကောင်းကျိုး အလုပ်တွေကလည်းပဲ မဖြစ်မနေ လုပ်ရမယ့် တာဝန်တွေ ဖြစ်လာနေပါပြီ။ အလဟသတ် အချိန်ဖြုန်းတာကို ရှောင်ကျဉ်တာတွေ၊ မိမိစိတ်ကို အမြဲတမ်း လန်းဆန်းတက်ကြွနေအောင် ပြုလုပ်တာတွေကအစ လူသားတစ်ရပ်လုံးအထိ မလုပ်မနေ တာဝန်တွေ ရှိလာနေပါပြီ။ ကမ္ဘာ့ရွာကြီးမှာ မိမိအတွက်၊ မိမိနိုင်ငံအတွက် မိမိမှာ တာဝန်ရှိတယ်လို့တောင် ပြောလို့မရတော့ပါဘူး။ တစ်ကမ္ဘာလုံးအတွက်ပါ တာဝန်တွေက လိုအပ်လာပါပြီ။
ဒီနေရမှာ တာဝန် နှစ်မျိုးရှိပါတယ်။ Duty နဲ့ Responsibility ပါ။ Duty ဆိုတာက မိမိကို သူများကခိုင်းလို့ လုပ်ရတဲ့ တာဝန်မျိုး ဖြစ်ပါတယ် (အစိုးရကပေးတဲ့ တာဝန်၊ အဖွဲအစည်းကပေးတဲ့ တာဝန်မျိုး စသည်)။ Responsibility ဆိုတာက ဘယ်သူကမှ မိမိကို မခိုင်းပါဘဲ ပြုလုပ်ရတဲ့ တာဝန်မျိုး ဖြစ်ပါတယ် (မိဘတာဝန်၊ သားသမီးတာဝန်၊ အိမ်ထောင့်တာဝန် စသည်)။ ဘယ်လို တာဝန်မျိုး၊ အလုပ်မျိုးပဲ ဖြစ်ဖြစ် မိမိမှာ ပြုလုပ်ရမယ့် တာဝန်ရှိလာပြီ ဆိုရင်တော့ စိတ်ပါလက်ပါ လုပ်ဖို့ လိုပါတယ်။
အလုပ်တစ်ခုကို စိတ်မပါဘဲ လုပ်နေရတာဟာ တစ်ကမ္ဘာလုံးက အလုပ်တွေကို မိမိတစ်ယောက်ထဲ သိမ်းကျုံးပြီး လုပ်ရသလိုမျိုး ခံစားရတတ်တယ်။ အလုပ်ကလည်း မတွင်ဘဲ ရင်ထဲမှာ အပူဇောနဲ့ သောကလည်း ရောက်ရတယ်။ အလုပ်မှာ စိတ်မပါရာကတဆင့် စိတ်တွေပျက်လာမယ်။ ပြီးတော့ ဒေါသထွက်ပြီး ဘာကိုမှ အကောင်းမမြင်တော့ဘဲ အလုပ်ကပေးတဲ့ဒါဏ်နဲ့ မိမိကိုယ်မိမိ ပြန်ပြီးနှိပ်စက်သလို ခံရတတ်ပါတယ်။
ဒါပေမယ့် ဘဝက အလုပ် မလုပ်ဘဲနဲ့ နေလို့မှ မရတာ။ အလုပ်က နောက်ဆုံးထွက်သက်ထိတောင် လုပ်ချင်လုပ်နေရဦးမှာ မဟုတ်ပါလား။ ဆရာကြီး ဦးမြကြိုင်ဆီမှာ သင်တန်းတက်တုန်းက ဆရာကြီးပြောခဲ့တဲ့ စကားလေးတစ်ခွန်းကို အမှတ်ရမိတယ်။ “I am enough. ငါ ဒီလောက်ဆို လုံလောက်ပြီး” လို့ ဆုံးဖြတ်လိုက်တဲ့နေဟာ မင်းတို့ဘဝမှာ ကျဆုံးတဲ့နေပဲတဲ့။
သူငယ်ချင်းတို့ရေ……….
လူဆိုတာ အလုပ်နဲ့ လက်၊ လက်နဲ့ အလုပ် မပြတ်လုပ်နေမှ ဘဝက စိတ်ချမ်းသာမှုနဲ့ ရပ်တည်လို့ ရမှာ။ ဒီအလုပ်ကို မလုပ်လို့ကလည်း မဖြစ်နိုင်တော့ လုပ်ချင်းအတူတူ စိတ်ပါလက်ပါလေးသာ လုပ်ကြမယ်ဆိုရင် မိမိမှာ စိတ်ချမ်းသာစရာတွေ ကြုံတွေရမှာ သေချာသလို စိတ်ဖိစီးမှုနဲ့ ဖိအားတွေ ကင်းဝေးလို့ လိုရာဆန္ဒတွေ ပြည့်ဝပါလိမ့်မယ်။
ဘဝနဲ့ဆန္ဒ တစ်သားတည်းကျပါစေ…………..
လင်းမြတ်(ပန်းတောင်း)
No comments:
Post a Comment